October 19, 2010

AED Missions Department Conference hlim tak hman zawh a ni ta

Aizawl East District Missions Department Conference vawi 17-na chu dt 15th-17th.October.2010 chhung khan Hnahlan Community Hall-ah tluang tak leh hlim taka hman zawh a ni ta. He inkhawmpuiah hian Palai riaklût in report zat hi 1000 chuang niin khaw thenawm hnai atangin lehlânga kal an awm nual bawk. Pator Bial 26 atangin Missions Dept. Bial leh local hruaitu bakah thalai, nu leh pa thahnem takin he inkhawmpui hi hlim tak leh hlawk takin an hmang a ni.

Dt 16.October.2010 Inrinni chhun khan Hnahlan Hqrs Biak inah Rorel inkhawm neih a ni a, hetiang hi rorel tlangpui te an ni (Minute ang diak diak lovin):

1. Kum 2011 Conference na hmun atan Bethlehem Bial a ni ang a, 2012 –ah Zohmun Bial a ni ang.

2. UPC NEI Constitution Article 22, Sec 138-naa Gen. Missions Board member-ah Field Director te dah an ni hi uluk zawka zirho turin Gen. Missions Conference Agenda-a thlen ni se

3. District Missions Deptt. Conference leh Board meeting rorel minute te tualchhung kohhran tin sem ni tawh se

4. District chhunga kohhran la din lohnaah din ngei tura chak taka hmalak ni se

5. District-in Home Missionary a laktharten an hna an zawm hmain Training pek ni thin se

6. Dist. Missions Deptt.-in Missionary Support a neih hi appeal hun leh lakkhawm hun bituk awm tawh se

7. Missionary Convention hi kum 3 danah Gen. Missions Dept hmalaknaa nei thin tura Gen. Missions Deptt-ah thlen ni se, tih te an ni

He inkhawmpuiah hian Merry Lalnunsangi, Rev HL Dawngliana, Rev R.Lalthanzuala, Rev VL Dika Sailo leh Rev. R.Lalhawia ten Pahthian thuchah an sawi thin a, an thusawite Lalpan mal a sawm hle. Tin, zai boruak a nuamin inkhawm apiangin Zion hlapui rem a ni a, Zaipawl te zaia rawngbawlna pawh thlarau lam boruak nen chhunzawm a ni thin bawk. Pathianni zan khan tlaivara lenkhawm niin he inkhawmpui chhung hian Thlarau awmpuina leh malsawmna nasa tak inkhawmpui palai ten an dawng a, inkhawmpui chhung hian mi 4 in Isua hmingin Baptisma an chang a ni.


No comments:

Post a Comment

Comment tu te chungah kan lawm. Kan site in tlawh tih a hriat e.. Comment zel teh u