October 11, 2010

N.Mz Dist LAD Conference Vawi 41-na hlim taka hman a ni

North Mizoram District LAD Conference vawi 41-na chu Neuva Hall, SUMSUIH, Sialsuk bialah dt 8-10.Oct. 2010 khan tluang tak leh hlim taka neih zawh a ni ta. He inkhawmpuiah hian Pathianni thlenga Palai riak lût in report zat chu 780 vel niin lânga inkhawmpui hmang 150 te nen LAD Inkhawmpui palai hi 930 vel an ni.
Inkhawmpui tan zan, dt 8.Oct.10 Zirtawp tlai leh zan khan Sumsuihah hian Ruah sûrin thli a tleh avang leh Power lam a awm loh avangin inkhawmpui hi tan theih a ni lova. A tûk inrinniah tan chauh niin Neuva Hall-ah rorel a ni a, rorel palai 363 niin thu pawimawh tak tak an rel a ni. Dt 10.OCt.10 zingkar khan Sumsuih UPC Biak inah Dist LAD Board neih zui nghal niin Conference rorel bawhzui ngai leh Agenda pawimawh tak tak an rel a, Inrinni zan, Pathianni zing, Chhun leh Zanah inkhawm niin Thlarau boruak a thain hlim takin hun hman a ni. 'Lal Isua lo kal lehna' tih thupui hmanga Speaker Rev.C.Lalrammuana rawngbawlna Lalpan a hmang hle a, Pathianni zanah Rev.C.Lalmuanpuia, Dist Supdt-in Pathian thuchah a sawi ve thung. North Mizoram Dist PYD Choir leh Sis. Laldanglovi ten fakna hla mawi takin an sa thin a, Sumsuih PYD ten inkhawmpui palai thlahna hla an rem bawk. N.Mizoram Dist hruaitute bakah bialtu pastor thahnem takin he inkhawmpui hi an telpui. Rev.K.Darsailova, UPC-NEI Gen.Supdt te nupa pawhin he inkhawmpui hi telpuiin Sis, Darthahniangi, Central Dist LAD Pre.; Sis. Zaithangliani, Gen LAD Secy.; Sis. Rohlupuii, Gen. LAD Trea. te leh bakah Aizawl East Dist LAD hruaitu : Sis. Lalhlupuii leh Sis. Ronguri ten inkhawmpui hi an telpui bawk.
Pathianni chawhma inkhawmah kum 2009 chhunga member boral 43 zunna hun hman niin, chawhnu inkhawmah target tlak te lawmman pek niin, inkhawmpui palai kal zinga kum 70 chin te 'an thingpui inna tur' hlan a ni bawk. Inrinni zan leh Pathianni zanah zaikhawm niin Pathianni zan hian tlaivara zaikhawm a ni nghe nghe.
Inkhawmpui rorel leh District Board rorel tlangpui te (Minute ang diak diak lovin):
1. Nakkum 2011 LAD Conference chu Kohhranpui Conference-ah bet mai se, 2012-ah Kolasib, 2013-ah Aibawk-ah nghah a ni ang.
2. Kumpuan neih mek bakah Buhfaitham uar kum hman belh ni se.
3. Incheina chungchangah uchuaklo leh mawihnai zawka inchei kan uar deuh deuh theih nan nasa taka hma lak ni se
4. District huapin thupui hrang hrang hmanga tawngtai buatsaih ni se
5. Bible chhiar chhuah neih ni se.
6. Kum 2011 Budget atan Rs 5,30,000.00 pawm niin Kohhranpuiah approve tura thlen ni se.
7. Conference thlengtu tanpuina chu tihsan niin 2012 atang chuan Rs 30,000.00 a ni tawh ang.

No comments:

Post a Comment

Comment tu te chungah kan lawm. Kan site in tlawh tih a hriat e.. Comment zel teh u