Mithianghlim te lenna ramah REV.ZALAWMA a kal ta!!!!

Rev. Zalawma (kum 61), General Sunday School Director ni mek chuan Tuk in (Dt 18.04.2011) Thawhtanni zing khan LUNGPHUCHAWL in Natna leh hrehawmna awm tawh lohna ramah min kalsan ta.
Rev. Zalawma boral thu hian North East India UPC member te thin a thawngin mi a barakhaih tak zet a, amah uitu leh suntu an tha hnem hle.
A thih chhan & Thih dan :

Rev. Zalawma hi nikum 2010 October thla bawr vel atang khan insawisel deuhin nerve tha lo niin dawktawr ten an sawi a, a ke lamah kawng kal harsat deuhin bawksawp em em lovin nerve tha lo in a damsam meuh lo thin a, mahse mi tuarchhel leh taima anih avangin office hna a thulh em em ngai lo.

General Conference vawi 43 na hmangin Lunglei hmunah a kal a, inkhawmpui hun chhung pawh hian insawiselna em em a nei lem lo va. Pathianni zan dar 12 hma deuh thlengin a fate nen thlenin inah titiin hun ala hmang a, insawiselna em em pawh neilovin zan a mu a, tichuan Dt 18.04.2011 Thawhtanni zing dar 8:30am vel khan a thlenna ten a zing tho har, chaw ei tura kaihthawh an tum chu thiin an va hmu ta a ni. Hetia khuma thia an va hmuh hian mihring tling tawhlovin bawihsawm ngial mahse Lalpan a rama cheng turin a la ta a ni.

A Chanchin tawi:
Rev Zalawma hi kum 1950 khan Haulawngah piangin kum 1979 khan Pastor atan lak a ni a. Bial hrang hrangah pastor hna hi thawkin rawngbawltu tha leh rorel thiam (administrator tha tak) a ni. Mi chak, kohhran hmangaihtu leh hmasawnna duh tu, mi dik a ni. General PYD President te pawh lo ni tawhin Lunglei District Superintendent, Secretary, Treasurer hna te pawh a lo thawk tawh a, ani hnuaiah hian Lunglei District chuan nasa takin hma sawn nghe nghe a ni. General Missions Director ni tawhin kum 2010 atanga a thihni thlengin General Sunday School Director hna a chelh a ni.
A Nupui Pi Vankhumi nen hian Aizawl Chanmari-ah an khawsa mek a, fa 4- mipa 3 leh hmeichhia 1 neiin a fate hian kawppui an nei vek tawh a, tu 13 a nei tawh bawk. Rev. Zalawma ruang hi an inpui Farm veng Lunglei-ah lak niin Dt 19.04.2011 Thawhlehni chhun dar 12:00 hian vui a ni ang.
Rev. Zalawma thihna hian mite thinglung a khawih tak zet a, amah ui tu leh suntu thahnem tak ten lainat leh khawngaih takin dt 18.04.2011 hian a ruang hi an tlaivarpui ang a, a lei taksa chu chatuana then tur leh inhmu tawh ngai lo turin Dt 19.04.2011 hian Farmveng thlanmual-ah zalh a ni dawn ta a ni.