Kohhranin harsatna a tawh avanga kum 1994 kuma khar, Pathian Biak inkhawm na tana hawn theihloh tura kalh tlat Chaltlang Biak In chu, vawiin Dt. 22th September 2011 Ningani chawhma dar 10:50 vel khan hawn a ni.
Biak In hawnnaah hian Sawrkar thuneitu lam leh venghimtu Police lamte telin, Mizoram UPC hruaitute leh N.E India UPC hruaitute, Chaltlang kohhran upa leh member thahnem tak awmin Biak In hawn a nih veleh hian Pathian hnenah tawngtaia hlan nghal a ni a. Hemi hnu hian thingpui leh a hmeh tui tak in leh eiho a ni a, engmah harsatna leh buaina a awm lo a, boruak muanawm leh zangkhai tak hnuaiah Biak in hi hawn a ni.
Kum 1994 kuma Kohhranin harsatna a tawh khan Chaltlang kohhran leh Biak in hi a tuar hmasatu niin kum 1994 kum laihawl khan Biak In pawh hi khar a ni ta thuai a. Kohhran harsatna leh buainain hi chingfel turin hruaituten theihtawp chhuahin an bei a, he harsatna hian kum 17 hmel a hmuh hnuin, Dt. 9.8.2011 a Court Thuchhuak, Sr. Civil Judge-2 Dr. HTC Lalrinchhana'n TS No. 2 (A) of 1996 Thubuai Remna a tichhuah chu bawhzuiin, Pathian khawngaihna leh remruatin Dt. 22nd September 2011 Ningani hian Sawrkar thuneitute nen Biak In hi hawn a ni ta a ni.
Biak In hawn a nih veleh hian Chaltlang kohhran chuan hnatlangin tihfai ngai te tifaiin siamthat leh thuamthat hna a thawk nghal char char a, kohhran member thawkchhuak pawh an thahnemin an phur hle. Tunkar chhung zawng hian Hnatlang hi chhunzawm tur a ni.
Comments
Post a Comment
Comment tu te chungah kan lawm. Kan site in tlawh tih a hriat e.. Comment zel teh u