Aizawl East District Missions Conference vawi 18-na hlim takin hman zawh a ni ta

AED Dist. Supdt. Rev. R.Lalhawiana Pathian thuchah a sawi

Aizawl East District Conference vawi 18-na chu hlim takin hman zawh a ni ta. Dt. 28th-30th October 2011 chhunga Bethlehem Aizawl Biak Ina District Missions Conference-ah hian palai kal an tha hle. Conference thupuiah ‘In kephaha in rah apiang in chu in ta a ni ang’ Deut : 11: 24 tih thu hman a ni.  Zirtawp zan October 28, 2011 zan khan Rev. Rosanga Kawlni, Aizawl East District Treasurer chuan Conference hi hawngin Zirtawp zan inkhawmah hian Rev. Lianzira, Missionary(Zokhawthar) chuan Pathian thuchah a sawi. Inrinni zanaha  Rev. V.L Dika Sailo, General Missions Director UPC NEI in Pathian thuchah sawiin Pathianni zing inkhawmah District Superintendent, Rev. R. Lalhawian a sawi thung. Pathianni Chhunah Rev. P.C Lalnghakliana, District Secretary, AED chuan  Pathian thuchah sawiin Missionary Support zawnna hun a hmang bawk Pathianni Zan hian District Missions Director Rev. K.Hrangvunga chuan Pathian thuchah a sawi thung.

Inkhawmpuiah hian Sis. Lalchhanhimi Ralte, Sis. Lalthansangi, Bro. H. Lalrinawma, Evan. Lalhmangaihawma (Sialhau Missionary), Sis. Sangkhumi (Saichal Missionary) ten  Pathian fakna hla an sa thin ang a. Tin, Bethlehem bial, Bazar bial, Bawngkawn bial leh Thuampui bial PYD ten zaia rawngbawlna an nei.

October 29, 2011 Inrinni khan Conference rorel neih a ni a, rorel palai 270 vel niin Agenda 12 ngaihtuah a ni. Rorel tlangpui te:

1. Kum 2013 Conference na atan Saitual bial a ni ang (Kum 2012 chu Zohmun bialah nghah sa a ni).

2. General Missions hnuaia Missionary hnathawktu ten General. District leh bial kaltlang lo chuan thawhlawm/support khawn tawh lo se.

3. General Missions hmalaknaa Guwahati a ram lei tur hi chak taka hmalak ni rawh se.

4. District Missions bul tumin thuthlung lam hawia track siama sem ni se.

5. Tualchhung atanga General thlengin thuthlung sawi uar ni se

6. General leh District Missions ten an hmachhawp an neih apaing tualchhungin kan lo hriat ve zel theih nan a rang lama bial tinte hriattir thin ni se

7. District Missions Department Conference thlengtu tanpuina hi Rs 40,000/- ah tihsan ni tawh se.

October 31, 2011 hian District Missions Board neih nghal a ni a, Conference rorel leh tihtur hmachhawp awmte relin thil pawimawh tak tak an ngaihtuah nghal ang.